Dwi wedi bod dan ofal Ymyrraeth Gynnar mewn Seicosis (YGS) ers blwyddyn a hanner bellach. Mae wedi bod yn bleser cael cymryd rhan mewn nifer o weithgareddau a drefnwyd gan EIP gan gynnwys dringo cerrig mawr, gwersylla, caiacio a heicio.
Mae cwrdd â phobl eraill sydd â seicosis a rhannu straeon, a hefyd cael amser da ar y teithiau wedi bod yn anhygoel ac yn fuddiol iawn wrth i mi wella.
Roeddwn i’n barod i roi’r gorau iddi
Dwi ddim yn gwybod lle byddwn i nawr heb y cymorth mae EIP yn ei ddarparu. Er enghraifft, doeddwn i ddim yn meddwl y byddwn i’n gallu gorffen fy ngradd Meistr ar ôl yr episod, ond ar ôl llawer o ystyried a thrafod, llwyddais i gyflwyno’r traethawd hir fis diwethaf.
Roeddwn i’n barod i roi’r gorau iddi, ond ar ôl llawer o drafod gyda theulu a gweithwyr iechyd, penderfynais fynd amdani. Mae fy ngoruchwyliwr prosiect hyd yn oed wedi cysylltu â mi i drafod a hoffwn i wneud PhD, rhywbeth nad oeddwn i erioed wedi meddwl fyddwn i’n gallu ei wneud.
Diolch i fy ngweithiwr cymorth cyfoedion, sy’n ffynhonnell wych o wybodaeth am ymarfer corff, dwi hefyd wedi dechrau mynd i’r gampfa yn rheolaidd eto. Mae wedi fy helpu gyda chodi pwysau a phaffio padiau, gan roi cyngor rhagorol a chymhelliant wrth ddod gyda mi i’r gampfa leol.
Dwi wir yn mwynhau ymarfer corff unwaith eto diolch i’w gefnogaeth, sy’n rhywbeth doeddwn i ddim yn meddwl y byddai’n bosibl o ystyried un o sgil effeithiau fy meddyginiaeth (anhedonia).
Mae cefnogaeth fy nheulu wedi bod yn hanfodol
Dwi’n byw gyda mam ar hyn o bryd, ac mae hi hefyd wedi bod yn hynod o gefnogol, ac wedi cyfathrebu’n helaeth ag EIP drwy gydol y broses. Boed hynny trwy fynd i grwpiau misol i aelodau’r teulu neu gael pum munud o sgwrs yn ystod ymweliad y nyrs neu’r gweithiwr cymorth cyfoedion, mae hi wedi cymryd pob cyfle i asesu lefel fy lles meddwl er mwyn deall pa mor bell y dylwn gael fy ngwthio.
Mae hi wedi helpu i sicrhau fy mod i’n brysur ac yn weithgar yn academaidd a thrwy waith tŷ dydd i ddydd, rhywbeth nad oeddwn byth yn arfer ei wneud.
Mae gennym ni system hefyd i fy atal rhag defnyddio canabis ac alcohol yn ormodol, dau beth sy’n gwaethygu fy symptomau’n fawr a dwi’n hapus i ddweud fy mod i’n sobr ers bron i flwyddyn bellach, a bod fy symptomau’n ysgafn ac yn anaml iawn erbyn hyn.
Dwi ddim yn gwybod lle bydd bywyd yn mynd â fi yn y dyfodol, ond dwi’n llawer mwy parod i ddyfalbarhau a goresgyn heriau diolch i gefnogaeth barhaus fy nheulu, ond hefyd y tîm yn EIP.
Rhagor o wybodaeth
- Darllen mwy amdano seicosis – Deall seicosis
- Podlediad – Gwrandewch ar straeon go iawn gan bobl ifanc sydd wedi profi seicosis yng Nghymru: podcast Piece of Mind gan Ganolfan Iechyd Meddwl Genedlaethol
- Cymryd rhan yn astudiaeth CONNECT – Defnyddio dyfeisiau clyfar i ragfynegi cyfnodau o seicosis
- Ymunwch a Gymuned Ymchwil NCMH